Ich ghöre es Glöggli und guet Nacht am Sächsi hetti gsait,
aber ich will jetzt lieber nüüt gsait ha,
will ich weiss du g’hörsch das nöd gern.
Aber wänn’s dir jetzt d’Schprach verschlaat nur will ich no gsait han, ich sägi jetzt lieber nöd wieso ich nüüt säg,
dänn chumi au nöd drus, eh nöd drus

Ja warum saisch dänn du nüüt ?
Aber gell, da däzue gits nüüt me z’säge, nei
susch het i gsait, säg’s ruhig hetti gsait, muesch nöd säge sägisch lieber nüüt, will ich hegi scho alles gsait.
oder so…

Aber ich säge dir, au wänn mer nüüt sait,isch no lang nöd alles gsait und muesch di jetzt gar nöd schäme, will ich han scho viel dümmers ghört.
Sogar üsä Bundespräsident het gsait mir müessed jetzt all am gliche Schtrick, all am gliche Schtrick, aber all
am gliche Schtrick hange laa chönd’s üs doch nöd.
oder scho? oder sowieso?

I dä Türkei chönt’s es und in Ungarn au. In Pole sind’s uf em beschte Weg und z’Amerika? …sind’s immer ganz vorne dra.

Ich ghöre es Glöggli und guet Nacht am Sächsi hetti gsait aber warum saisch dänn du immer no nüüt? Du chasch doch nöd di ganzi Ziit numä schwigä
wänn ich dir all mini Ängscht, mini Sorge
und mis truurige Herz vor dir da uf dä Tisch legge und so tue, als segi nüüt passiert und mir seget ja schliesslich no immer ungschore devo cho. oder scho?

Aber ich säge dir, grad will nüüt passiert, isch scho so vill passiert und es wird no meh passiere, solang nüüt passiert will denn grad das passiert wo passiert, wenn nüüt passiert. Ich weiss du g’hörsch das nöd gern, nei, ihr g’höret das nöd gern

Aber lueget doch nur wie’s rund um üs dä Bach ab gaat. und wänn’s no lang so wiiter rund um üs dä Bach ab gaat, bis es rund um üs nüm wiiter dä Bach ab ga cha, dänn gaats bi üs au dä Bach ab bis es da au nüm wiiter dä Bach ab cha ga.oder so, das tuet weh, wottsch no meh?

Dänn guet Nacht am Sächsi, hetti gern gsait, aber ich weiss äfäng nüme was säge, als ob scho alles g’sait wär, und alles was g’sait isch nüüt me z’säge hät, wo me nur no cha säge dass mer nüme cha säge, was no öppis z’säge hät, au wänn du das nöd gern g’hörsch.

Weisch dänn du was passiert,
wenn’s üs d’Schprach verschlaat?
Hesch dänn du mini Träne nöd gseh?
So chum, bitte red mit mir.

Pierroz 2016